تماشا

معنی

١ - دید، نظارہ، دیکھنا۔  تماشا کہ اے محوِ آسینہ داری تجھے کس تَمنّا سے ہم دیکھتے ہیں      ( ١٨٦٩ء، دیوانِ غالب، ١٧٩ ) ٢ - دلچسپ منظر۔  مختلف شکلوں میں اس کو جلوہ گر دیکھا کئے یہ تماشا ہم تو بیٹھے عمر بھر دیکھا کئے      ( ١٩١٩ء، درشہوار، بیخود، ٩٩ ) ٣ - حالت، کیفیت۔  ترے ہجر میں جان پر کھیلے کیا کیا تماشے رہے ہیں یہاں کیسے کیسے      ( ١٩٠٣ء، نظم نگاریں، ١٣٢ ) ٤ - تفریح اور دل بستگی کا کھیل جس میں ناچ، گانا یا اُچھل کود ہو، ڈرامہ۔ "اس تماشا (ڈرامہ) کے حصے کر دیئے گئے۔"      ( ١٩٣٩ء، ریزۂ مینا، ٩ ) ٥ - کرتب، شعبدہ، نمائش۔ "ولید بن عقبہ جو صحابی تھے کوفہ کے گورنر تھے ایک دفعہ ایک یہودی نے ان کے سامنے شعبدہ بازی کے تماشے دکھائے۔"      ( ١٩٠٤ء، مقالاتِ شبلی، ١٩٥:١ ) ٦ - ہنسی کھیل، بازیچہ، آسان کام۔ "دنیا کی زندگی تو نرا کھیل تماشا ہے۔"      ( ١٨٩٥ء، ترجمہ قرآن مجید، نذیر احمد، ٢٠٩ ) ٧ - عجب یا انوکھی بات۔ "عجیب تماشا ہے! وہ بولا تم پولیس والے بھی عجیب لوگ ہو۔"      ( ١٩٤٤ء، صید و صیاد، ١٤٢ ) ٨ - ایسی شے یا حالت بن جانا جسے لوگ حیرت اور شوق سے دیکھیں۔ "فارسی کے مولوی صاحب ایک تماشا تھے، لمبا چہرہ سرخ و سفید رنگت. ہر وقت پان کھاتے رہتے تھے۔"      ( ١٩٤٧ء، مضامینِ فرحت، ٥:٤ ) ٩ - دل لگی کی چیز، مذاق، تفریح طبع کا سامان ۔ "حسن آراء کے چوچلے اور اسکے نوکروں کی نازبرداریاں دیکھ کر. مکتب کی لڑکیوں کو اچھا خاصا تماشا مل گیا۔"      ( ١٨٧٣ء، بنات النعش، ١٤ )