عالم

معنی

١ - دنیا، جہان، کائنات۔ "حضرت ابوسعید خدری سے منقول ہے کہ عالم چالیس ہزار ہیں۔"    ( ١٩٦٩ء،معارف القرآن، ٢٣:١ ) ٢ - کائنات کا کوئی جزو، علاقہ۔ "عالم اسلام کی جانب غاضبانہ اور معاندانہ نگاہ اٹھانے کی جرأت پیدا نہیں ہوئی تھی۔"    ( ١٩٤٧ء، جراحیات زہراوی (پیش لفظ)، ١ ) ٣ - خلق خدا، مخلوق، لوگ، انواعِ مخلوقات۔ "مجموعہ مخلوقات کو عالم کہتے ہیں۔"    ( ١٩٣٢ء، تفسیرالقرآن الحکیم، مولانا شبیر احمد عثمانی، ٢ ) ٤ - وقت، زمانہ، دور، موسم۔  عالم سوز و ساز زمیں وصل سے بڑھ کے ہے فراق وصل میں مرگِ آرزو! ہجر میں لذتِ طلب!    ( ١٩٣٥ء، بال جبریل، ١٥٥ ) ٥ - دلکش منظر، نظارا، تماشا۔  اپنے مرکز کی طرف مائل پرواز تھا حسن بھولتا ہی نہیں عالم تری انگڑائی کا      ( ١٩٠٥ء، گلکدہ، عزیز لکھنوی، ٣ ) ٦ - حسن، بہار، رونق، روپ۔ "اس میں شک نہیں کہ لکھنو کی اس مٹی ہوئی حالت پر بھی ایک عالم ہے۔"      ( ١٩٠٤ء، مضامین چکبست، ٤٠ ) ٧ - کیفیت، حالت، حال۔  کچھ ہوش نہیں کہ ہوں میں کس عالم میں ساقی نے یہ کیا پلا دیا ہے مجھ کو      ( ١٩٤٦ء، طیور آوارہ، ١٦٦ ) ٨ - طور طریقہ، رنگ ڈھنگ، انداز، وضع، قرینہ۔ "مہاتما بدھ کو کس کس عالم میں دکھایا گیا ہے۔"      ( ١٩٨٠ء، زمین اور فلک اور، ٦٩ ) ٩ - مانند، نظیر۔  جدھر سے میں گزرتا ہوں نگائیں اٹھتی جاتی ہیں مری ہستی بھی کیا تیرا ہی عالم ہوتی جاتی ہے      ( ١٩٥٤ء، آتش گل، ١٢٥ ) ١٠ - [ تصوف ]  ظلِ وجود حقائق کو کہتے ہیں جو صورت ممکنات کے ساتھ ظاہر ہوا ہے۔ (ماخوذ: مصباح التعرف، 172) ١١ - قسم، صنف، جنس۔ (فرہنگ آصفیہ: مہذب اللغات)