نام

معنی

١ - وہ لفظ جس سے کسی ذات یعنی انسان، شے وغیرہ کا علم ہو، کسی کو پکارنے کے لیے ایک مخصوص لفظ، اسم۔ "نام ہیں بتایا، اچھا، وہ رکتے ہوئے بولا"      ( ١٩٨٧ء، آخری آدمی، ٤٦۔ ) ٢ - شہرہ، شہرت، دھاک، نمود۔ "اس اہتمام سے علوم و فنون کی تربیت پر توجہ کی کہ ہارون الرشید اور مامون الرشید کا نام بھی ماند پڑ گیا"      ( ١٩١٤ء، شبلی، مقالات، ٢٣:٥۔ ) ٣ - نسل، اولاد، خاندان۔  شہرہ ہے حرب و ضرب شہِ خاص و عام کا سکہ ہے شش جہت میں ہمارے ہی نام کا      ( ١٨٧٤ء، انیس، مراثی، ٩٦:٢۔ ) ٤ - یاد، یادگار، نشان، آثار۔  یہ پہنچا کون ایسا بادہ آشام سبو میں قطرۂ مے کا نہیں نام۔      ( ١٩٣٢ء، بے نظیر، کلامِ بے نظیر، ٢٦٠۔ ) ٥ - عزت، آبرو، ساکھ، بھرم۔  دنیا کی کچھ نہیں ہے سرانجام کی تلاش گر ہے ہمیں جہاں میں تو کچھ نام کی تلاش      ( ١٨٧٢ء، دیوانِ محبت، (قلمی نسخہ)، ٨٨۔ ) ٦ - تذکرہ، بیان، چرچا، ذکر، کہنا۔  دوستو، اُس چشم و لب کی کچھ کہو جس کے بغیر گلستاں کی بات رنگیں ہے، نہ میخانے کا نام      ( ١٩٥٢ء، دستِ صبا، ٧٠۔ ) ٧ - ذات، وجود۔  تم اے بے نظیر اور گلیوں کا پھرنا نہ ہو گا بھلا نام بدنام کب تک      ( ١٩٣٢ء، بے نظیر، کلام بے نظیر، ٩١۔ ) ٨ - مترادف، ہم معنی۔  رنگ پیراہن کا خوشبو زلف لہرانے کا نام موسمِ گل ہے تمہارے بام پر آنے کا نام      ( ١٩٥٢ء، دستِ صبا، ٧٠۔ ) ٩ - قسم، مد، جنس، زمرہ، قبیل۔ "ننگے کان، سونٹا سے ہاتھ، گہنے کے نام چاندی کا تار نہیں"      ( ١٩٠٨ء، صبح زندگی، ١٢٧۔ ) ١٠ - حیلہ، بہانہ، آڑ، پردہ۔ "اصل تجویز ان ہی لوگوں کی تھی، سرکاری منظوری کا فقط نام تھا"      ( ١٨٩٥ء، حیاتِ صالحہ، ١٤۔ ) ١١ - ذمے؛ متعلق، لیے، واسطے، نام پر، نام زد، منسوب۔ "عمدہ پختہ مکانات بنا دیے اور انہیں کے نام کر دیے"      ( ١٩٠٥ء، یادگار دہلی، ١٠٦۔ )