پھیر

معنی

١ - راہ کی کجی، چکر، گھماؤ، موڑ۔ "یہاں سے راستہ پھیر کھاتا ہوا سب سے بلند مقام پر پہنچتا ہے۔"      ( ١٩٠٣ء، چراغِ دہلی، ٤٤٣ ) ٢ - دوری، فاصلہ، بعد، فرق۔ "دوسرے راستے سے دو سو میل کا پھیر پڑتا تھا۔"      ( ١٩١٩ء، روزنامچہ حسن نظامی، ٣٣٨ ) ٣ - پیچ، جال، فریب، پھندا۔ "اندر تھوڑا قیمہ رکھ کر مثل سموسے کے دو پھیر لپیٹیں۔"      ( ١٩٣٢ء، مشرقی و مغربی کھانے، ٨٦ ) ٤ - وسعت، پھیلاؤ، پورا پورا حال۔  آنچل اس دامن کا ہاتھ آتا نہیں میر دریا کا سا اس کا پھیر ہے      ( ١٨١٠ء، میر، کلیات، ٨٨٨ ) ٥ - بل، فرق، تفاوت، اختلاف۔  عاشق و معشوق و عشق اب دیکھنے کا پھیر ہے تین صورتیں نظر آتی ہیں اِک تصویر میں      ( ١٩١٩ء، کیفی، کیف سخن، ٦٢ ) ٦ - دور، حلقہ، احاطہ، پیٹا، گھیر۔ "کمر کا پھیر ضرورت سے زیادہ تھا۔"      ( ١٩٢٨ء، مضامینِ فرحت، ١٣:١ ) ٧ - دوران، چکر، گردش۔  پھیر ہے کیا مرے مقدر کا نہیں ملتا پتہ ترے گھر      ( ١٩٠٥ء، دیوان انجم، ٣ ) ٨ - [ مجازا ]  فکر، خیال، ادھیڑ بن؛ جوڑ توڑ۔ "ایک مسجد کے نہ جانے کس پھیر میں متولی ہو گئے تھے۔"      ( ١٩٤٣ء، دلی کی چند عجیب ہستیاں، ٨ ) ٩ - الجھن، چکر، الٹ پلٹ۔ "مہینہ بھر تک قرض کا پھیر رہا۔"      ( ١٩٠٨ء، صبحِ زندگی، ١٨٩ ) ١٠ - آمد و رفت، آنا جانا؛ گھراؤ۔  پپیہے کی رہ رہ کے پی پی کی ٹیر نرالا اثر ہے انوکھا ہے پھیر      ( ١٩٢٤ء، دیوانِ بشیر، ١٦٢ ) ١١ - واپسی، واپس کرنے یا لوٹانے کا عمل۔ (پلیٹس) ١٢ - ضمن، سلسلہ۔ "ان اعتراضات کے پھیر میں داغ پر . ذاتی حملے کیے گئے ہیں۔"      ( ١٩٠٥ء، مضامین چک بست، ٩٨ ) ١٣ - گچھا، لچھا؛ خم؛ محیط؛ کمی، خامی؛ نقصان، زیاں؛ بدنصیبی۔ (پلیٹس)۔ ١٤ - مشکل، بکھیرا؛ تشویش، گھبراہٹ؛ انقلاب، تغیر، تبدل؛ فکر، سوچ؛ ٹیڑھا پن، کجی؛ اندازہ، تخمینہ؛ باتوں میں معنی کا فرق، ابہام، ذومعنی۔ (جامع اللغات)۔