کھنچنا

معنی

١ - کسا جانا، تننا، جکڑا جانا۔  خاکساروں کی طرف سے جب گزرتا ہے کبھی یوں اکڑ جاتا ہے گویا کھنچ رہا ہے بند بند      ( ١٩٢٩ء، فکرونشاط، ٧٥ ) ٢ - اینچا جانا، گھسٹنا۔  بفرمان یدُاللّٰہ روز رجعت کھینچ کے آیا تھا پڑا ہے آج تک لرزہ سا جسم مہر تاباں پر      ( ١٩٣٥ء عزیز لکھنؤی، صحیفہ ولا، ١٠٨ ) ٣ - رکنا، دور رہنا، کنارہ کش ہونا، الگ رہنا، اجتناب کرنا۔  ان سے ملیے تو عافیت برباد ان سے کھینچئے تو زندگی بیکار      ( ١٩٢٤ء نقس و نگار، ١٤١ ) ٤ - گزرنا، بپتنا۔ "غرض اسی طریقہ سے کسی نہ کسی طرح کھنچی چلی جاتی تھیں"      ( ١٩٤٧ء، مضامین فرحت، ٩٠:٧ ) ٥ - عرق نکلنا، کشیدہ ہونا۔  مجھ پہ بھی لیکن ہوا طُرفہ اثر روح کا ست، پتیوں میں کھنچ گیا      ( ١٩٢٠ء روح ادب، ٣٤ ) ٦ - طول پکڑنا، دراز ہونا، عرصہ لگنا۔ "البتہ یہ ضرور تھا کہ سفر کھنچتا ہی جا رہا تھا. کہ دادی کا گھر کب آئے گا"      ( ١٩٧٠ء قافلہ شہیدوں کا، ٣٧٨ ) ٧ - بزور نکالا جانا، کھینچا جانا، گھسیٹا جانا  جان جا دم گھٹ رہا ہے کھینچتی ہے رگ رگ سے روح کس کشاکش میں پڑی ہے زندگانی وقت نزع      ( ١٨٧٠ء دیوان شرف (آغا حجو)، ١٣٤ ) ٨ - صورت پذیر ہونا، بننا، نقل ہونا، اترنا، عکس اترنا۔ "اسلامی سلطنت کی عظمت و جبروت کا . نقشہ آنکھوں کے کھینچ گیا۔      ( ١٩٤٣ء، حیات شبلی، ٢٧٣ ) ٩ - روانہ ہونا، باہر جانا، کسی طرف تیزی سے جانا۔ "انگریزی اسکول اور کالج میں مسلمان لڑکے کھنچ رہے تھے"      ( ١٩٤٣ء ) ١٠ - کشش ہونا، کسی کی کشش اور جاذبیت کے باعث اس کی طرف رجوع ہونا۔ "کسی داخلی تحریک و ترغیب سے میں اردو شاعیر کی طرف کھینچتا تھا"      ( ١٩٤٥ء، روحِ کائنات، ٨ ) ١١ - نقش ہونا، مرتسم ہونا، لکھا جانا، ثبت ہونا۔ "خاں صاحب کا آخری جواب یہ تھا کہ مجھے دلائل سننے کی ضرورت نہیں، کھینچی ہوئی لکیر نہیں مٹے گی"      ( ١٩٢٥ء مجالس حُسنہ، ٨١:١ ) ١٢ - [ لسانیات ]  (آواز کا) طویل ہونا، کشیدہ ہونا۔ اس نئے طریقے میں ایک اور دشواری حروفِ علّت کی کھنچی ہوئی آواز کے لیے ایک مقررہ نشان لگانے کی ہے"      ( ١٨٨٥ء، خطبات گارساں دتاسی، ٢٥٨ )