نبی اکرم ﷺ نے ۱۰ ھ میں فریضۂ حج ادا فرمایا. ہجرت کے بعد آپﷺ کا یہی پہلا اور آخری حج ہے. اسی لئے اسے حجۃ الوداع کہا جاتا ہے. اس حج کے موقع پر رسول اللہ ﷺ نے اپنا مشن امت کے حوالہ فرما دیا. اس موقع پر سوا لاکھ کا مجمع موجود تھا. آپﷺ نے پہلے تو مجمع سے گواہی لی کہ میں نے اللہ کا دین تم تک پہنچا دیا کہ نہیں؟ جب تین مرتبہ پورے مجمع نے اقرار کیا کہ بے شک آپﷺ نے حق تبلیغ، حق نصیحت اور حق امانت ادا فرما دیا تو پھر آپﷺ نے فرمایا فَلْیُـبَـلِّغِ الشَّاہِدُ الْغَائِبَ ’’یعنی (میں نے اللہ کا دین تم تک پہنچا دیا) اب وہ لوگ جو یہاں موجود ہیں (ان کی ذمہ داری ہے کہ اس دین کو) پہنچائیں ان تک جو یہاں موجود نہیں ہیں‘‘.