سورة هُود ۱۱:۱۲۳

‏ [جالندھری]‏ اور آسمانوں اور زمین کی چھپی چیزوں کا علم خدا ہی کو ہے۔ اور تمام امور کا رجوع اسی کی طرف ہے۔ تو اسی کی عبادت کرو اور اسی پر بھر وسہ رکھو۔ اور جو کچھ تم کر رہے ہو تمہارا پروردگار اس سے بےخبر نہیں۔ ‏
تفسیر ابن كثیر
علم غیب اور حاکمیت اعلیٰ صرف اللہ ہی کو سزاوار ہے 
آسمان و زمین کے ہر غیب کو جاننے والا صرف اللہ تعالٰی عزوجل ہی ہے۔ اسی کی سب کو عبادت کرنی چاہیے اور اسی پر بھروسہ کرنا چاہیے۔ جو بھی اس پر بھروسہ رکھے وہ اس کے لیے کافی ہے۔ حضرت کعب رحمتہ اللہ علیہ فرماتے ہیں کہ تورات کا خاتمہ بھی انہیں آیتوں پر ہے اللہ تعالٰی مخلوق میں سے کسی کے کسی عمل سے بےخبر نہیں ۔