لبِ خشک در تشنگی، مردگاں کا
زیارت کدہ ہوں دل آزردگاں کا

شگفتن کمیں گاہِ [1] تقریب جوئی
تصوّر ہوں بے موجب آزردگاں کا

غریبِ ستم دیدۂ [2] باز کشتن
سخن ہوں سخن بر لب آوردگاں کا

سراپا یک آئینہ دارِ شکستن
ارادہ ہوں یک عالم افسردگاں کا

ہمہ نا امیدی، ہمہ بد گمانی
میں دل ہوں فریبِ وفا خوردگاں کا

بصورت تکلّف، بمعنی تاسّف
اسدؔ میں تبسّم ہوں پژمردگاں کا

  1. نسخۂ حمیدیہ میں " کمیں دارِ" (جویریہ مسعود)
  2. نسخۂ حمیدیہ میں "غریبِ بدر جستۂ" بجائے " غریبِ ستم دیدۂ" (جویریہ مسعود)