اُن رس بھری آنکھوں میں حیا کھیل رہی ہے

اُن رس بھری آنکھوں میں حیا کھیل رہی ہے
دو زہر کے پیالوں پہ قضا کھیل رہی ہے

ہیں نرگس و گُل کِس لئے مسحُور تماشا
گُلشن میں کوئی شوخ ادا کھیل رہی ہے

اُس بزم میں جائیں تو یہ کہتی ہیں ادائیں
کیوں آئے ہو، کیا سر پہ قضا کھیل رہی ہے

خاموش رہ، خاموش، ذرا شور قیامت
کانوں میں وہ مستانہ صدا کھیل رہی ہے

اُس چشمِ سیاہ مست پہ گیسُو ہیں پریشاں
میخانے پہ گھنگھور گھٹا کھیل رہی ہے

بد مستی میں تُم نے اُنہیں کیا کہہ دیا اختر
کیوں شوخ نگاہوں میں حیا کھیل رہی ہے؟