سورۃُ الفاتحہ کا جزو ِاوّل

سورۃ الفاتحہ کے سلیس و رواں ترجمے‘ اس کے بارے میں چند تمہیدی باتوں اوراس کے مضامین کے اجمالی تجزیے کے بعد اب ہم اس سورۂ مبارکہ کے تینوں حصوں کو علیحدہ علیحدہ قدرے گہرائی میں اتر کر سمجھنے کی کوشش کریں گے. جیسے کہ اس سے قبل بیان کیا جا چکا ہے ‘اس سورۂ مبارکہ کا جزوِ اوّل تین آیات پر مشتمل ہے: 

اَلۡحَمۡدُ لِلّٰہِ رَبِّ الۡعٰلَمِیۡنَ ۙ﴿۱﴾الرَّحۡمٰنِ الرَّحِیۡمِ ۙ﴿۲﴾مٰلِکِ یَوۡمِ الدِّیۡنِ ؕ﴿۳﴾ 
’’کُل شکر اور کُل ثنا اللہ کے لیے ہے جو تمام جہانوں کا پروردگار اور مالک ہے‘ بہت رحم فرمانے والا‘ نہایت مہربان ‘ جزا و سزا کے دن کا مالک و مختار ہے‘‘.