اللہ کی جانب سے متنِ قرآن کی حفاظت اور معانی ٔقرآن کی وضاحت کی ضمانت

آیت ۱۶ میں نبی اکرمﷺ کو مخاطب کر کے جو بات فرمائی گئی ‘ یعنی آنحضورﷺ کو اپنی زبانِ مبارک کو قرآن حکیم کے ساتھ تیزی سے حرکت دینے سے کمالِ شفقت و محبت کے ساتھ روکا گیا‘ تو آپﷺ کے اس طرزِ عمل کا ایک سبب تو وہ تھا جو جلی انداز میں بیان کر دیا گیا‘ یعنی آپﷺ کی قرآن حکیم کے ساتھ غایت درجہ کی محبت اور اس کا حد درجہ شوق‘ جس کے نتیجے میں آپﷺ نازل شدہ آیاتِ قرآنی کو جلد از جلد یاد کر لینا چاہتے تھے تاکہ مزید وحی نازل ہو لیکن آیت ۱۷سے معلوم ہوتا ہے کہ آپﷺ کے وحی ٔ قرآنی کو یاد کرنے کے لیے تیزی سے زبانِ مبارک کو حرکت دینے اور اس طرح شدید مشقت برداشت کرنے کا ایک دوسرا سبب بھی تھا‘ اور وہ یہ کہ آپﷺ چاہتے تھے کہ آپﷺ وحی کے الفاظ کو اچھی طرح یاد کر لیں‘ مبادااس کا کوئی حصہ آپﷺ کی دداشت میں محفوظ نہ رہے اور اس طرح قرآن مجید کا کوئی لفظ یا کوئی آیت ضائع ہوجائے. چنانچہ آپﷺ کی اس تشویش کو رفع کرنے کے لیے ارشاد فرمایا گیا: اِنَّ عَلَیۡنَا جَمۡعَہٗ وَ قُرۡاٰنَہٗ ﴿ۚۖ۱۷﴾ ’’یقینا ہمارے ذمے ہے اس (قرآن) کو جمع کر دینا بھی اور اس کا پڑھنا (یا پڑھوانا) بھی!‘‘