فکرِ اقبال کی روشنی میں حالاتِ حاضرہ اور ہماری قومی ذمّہ داریاں

مجھے آج صبح ہی کی فلائٹ سے “شامِ الہدی” کے مستقل پروگرام کے لیے کراچی روانہ ہوجانا تھا لیکن مجلسِ اقبال میں شرکت کی سعادت کے لیے یہ ادنیٰ سا تردد تو ہر گز کوئی قربانی نہیں کہ یہاں سے سیدھا ائیر پورٹ اور ائیر پورٹ سے سیدھا تاج محل ہوٹل کراچی پہنچوں. البتہ منتظمینِ مجلس کا یہ احسان عمر بھر یاد رہے گا کہ انہوں نے خاص طور پر میری شمولیت کے لیے مجلس کا آغاز اپنے طے شدہ پروگرام سے ایک گھنٹہ پہلے کیا ... اس کے ساتھ ہی اپنی اس محرومی کا احساس بھی شدت سے ہے کہ آج سے ڈیڑھ سال قبل کی ایک مجلس کی طرح آج بھی مجھے اپنی گفتگو ختم کرتے ہی آدابِ مجلس کے خلاف فورا! روانہ ہوجانا ہوگا اور اس طرح میں اپنے سے بدرجہا اعلم و افضل اصحابِ علم و فضل کے افکار و خیالات سے مستفید نہ ہوسکوں گا. بہرحال “مالا یدرک کلہ لایترک کلہ” کے مصداق جو میسر آ گیا ہے غنیمت ہے!

بہت سے حضرات یقیناً اس پر حیران ہوں گے کہ ’میں اپنی روایت کے یکسر خلاف ‘ آج اپنے خیالات تحریری صورت میں پیش کر رہا ہوں. اس کی وجہ یہ ہے کہ عام معمول سے ہٹ کر اس بار ’ مجلسِ اقبال ‘ کے لیے بھی ایک موضوع تجویز کردیا گیا ہے یعنی “فکرِ اقبال کی روشنی میں حالاتِ حاضرہ اور ہماری قومی ذمہ داریاں” اور یہ موضوع اوّلاً تو خطیبانہ جوش سے زیادہ سنجیدہ غور و فکر کا متقاضی ہے... ثانیاً اس کا اندیشہ ہے کہ زبانی گفتگو کی رواداری میں اس کا کوئی اہم گوشہ تشنہ رہ جائے! .... پھر ایک خواہش یہ بھی ہے کہ یہ باتیں جلد از جلد وسیع پیمانے پر لوگوں کے سامنے لائی جائیں اور من و عن شائع ہوں لہٰذا “نۤ والْقَلَمِ وَ مَا یَسْطُرُوْنَ” کے مطابق ذہن و لسان کے مابین قلم کو خیالات کی شیرازہ بندی کے ذریعے کے طور پر استعمال کر رہا ہوں.