اَلْفَضْلُ مَا شَھِدَتْ بِہِ الْاَعْدَائُ… اصل فضیلت وہ ہوتی ہے جس کا دشمن بھی اقرارکریں.
بنگالی ہندو‘ انٹرنیشنل کمیونسٹ آرگنائزیشن کے رکن ایم این رائے نے کہا:’’اس میں کوئی شک نہیں کہ تاریخ انسانی کا عظیم ترین انقلاب محمد(ﷺ ) نے برپا کیا‘‘.
’’سو بڑے آدمی‘‘ کے امریکی عیسائی مصنف ڈاکٹر مائیکل ہارٹ کے نزدیک انسانی زندگی کے دو علیحدہ علیحدہ میدان ہیں. ایک ہے مذہب‘ اخلاق اور روحانیت کا میدان‘ جبکہ ایک ہے تمدن‘ تہذیب‘ سیاست اور معاشرت کا میدان‘ اور ان دونوں میدانوں میں انتہائی کامیاب انسان تاریخِ انسانی میں صرف اور صرف ایک ہی ہیں‘ اور وہ ہیں حضرت محمد(ﷺ ).
اسلام کا بدترین دشمن‘ عیسائی مؤرخ ایچ جی ویلز اپنی معروف تاریخِ عالم میں آنحضورﷺ کے خطبہ حجۃ الوداع کا حوالہ دینے کے بعد‘ یہ اعتراف کرنے پر مجبور ہو گیا: ’’اگرچہ انسانی اخوت‘ مساوات اور حریت کے وعظ تو دنیا میں پہلے بھی بہت کئے گئے تھے اور ایسے وعظ ہمیں مسیح ناصری کے ہاں بھی بہت ملتے ہیں‘ لیکن یہ تسلیم کئے بغیر چارہ نہیں کہ یہ محمد(ﷺ ) ہی تھے جنہوں نے تاریخِ انسانی میں پہلی بار ان اصولوں پر ایک معاشرہ قائم کیا‘‘.
چنانچہ دشمنوں کی گواہی سے بھی یہ بات ثابت ہو گئی کہ یہ تاریخِ انسانی کا عظیم ترین انقلاب تھا جو محمد رسول اللہﷺ نے برپا فرمایا. انقلابِ محمدی (علیٰ صاحبہ الصلوٰۃ والسلام) کا انقلابِ فرانس اور انقلابِ روس سے تقابل کریں تو نظر آتا ہے کہ انقلابِ فرانس میں صرف سیاسی نظام بدلا اور انقلابِ روس میں صرف معاشی نظام تبدیل ہوا لیکن انقلابِ محمدیؐ میں ہرچیز بدل گئی.مذہب بھی بدل گیا‘ عقائد بھی بدل گئے‘ رسومات بھی بدل گئیں‘ سیاسی نظام بھی بدل گیا‘ معاشی نظام بھی بدل گیا‘ معاشرت بھی بدل گئی. کوئی بھی شے اپنی سابقہ حالت پر قائم نہیں رہی.
دنیا میں جتنے بھی انقلابات آئے‘ وہ سب جزوی تھے. دنیا کا جامع ترین انقلاب محمد عربیﷺ کا انقلاب تھا. کیوں اور کیسے؟ اس سوال کا مفصل‘ مدلل‘ مختصر مگر جامع جواب دینے کے لئے بانی تنظیم اسلامی ڈاکٹر اسرار احمد صاحبؒ نے ’’رسولِ انقلابﷺ کا طریقِ انقلاب‘‘ کے عنوان سے ۱۶؍مئی ۲۰۰۴ء کو الحمرا ہال لاہور میں اہلِ علم و دانش کو خطاب کیا. یہ خطاب تحریری صورت میں مرتب کر کے کتابچے کی صورت پیش کیا جا رہا ہے.
محترم ڈاکٹر صاحبؒ نے ۸۵.۱۹۸۴ء میں مسجد دارالسلام باغ جناح لاہور میں نبی اکرمﷺ کے منہج انقلاب کے موضوع پر گیارہ خطابات کئے تھے. ان خطابات کے مجموعے پر مشتمل ایک ضخیم کتاب ’’منہج انقلاب نبویؐ ‘‘ کے نام سے شائع ہو چکی ہے‘ جس کے اب تک متعدد ایڈیشن منظر عام پر آ چکے ہیں. زیرنظر کتابچے کو ’’منہج انقلابِ نبویؐ ‘‘ کے ایک جامع خلاصے کی حیثیت حاصل ہے.
نحمدہٗ ونصلی علٰی رَسولہِ الکریم … امَّا بَعد:
اعوذ باللّٰہ من الشَّیطٰن الرَّجیم . بِسْمِ اللّٰہِ الرَّحْمٰنِ الرَّحِیْمِ
ہُوَ الَّذِیۡۤ اَرۡسَلَ رَسُوۡلَہٗ بِالۡہُدٰی وَ دِیۡنِ الۡحَقِّ لِیُظۡہِرَہٗ عَلَی الدِّیۡنِ کُلِّہٖ ٖ (التوبۃ:۳۳‘ الفتح:۲۸‘ الصف:۹)
وَ مَاۤ اَرۡسَلۡنٰکَ اِلَّا کَآفَّۃً لِّلنَّاسِ بَشِیۡرًا وَّ نَذِیۡرًا (سبا:۲۸)
لَقَدۡ کَانَ لَکُمۡ فِیۡ رَسُوۡلِ اللّٰہِ اُسۡوَۃٌ حَسَنَۃٌ لِّمَنۡ کَانَ یَرۡجُوا اللّٰہَ وَ الۡیَوۡمَ الۡاٰخِرَ وَ ذَکَرَ اللّٰہَ کَثِیۡرًا ﴿ؕ۲۱﴾ (الاحزاب:۲۱) … صدق اللّٰہ العظیم
معزز حاضرین اور محترم خواتین‘ السلام علیکم ورحمۃ اللہ وبرکاتہ
اعوذ باللّٰہ من الشَّیطٰن الرَّجیم . بِسْمِ اللّٰہِ الرَّحْمٰنِ الرَّحِیْمِ
ہُوَ الَّذِیۡۤ اَرۡسَلَ رَسُوۡلَہٗ بِالۡہُدٰی وَ دِیۡنِ الۡحَقِّ لِیُظۡہِرَہٗ عَلَی الدِّیۡنِ کُلِّہٖ ٖ (التوبۃ:۳۳‘ الفتح:۲۸‘ الصف:۹)
وَ مَاۤ اَرۡسَلۡنٰکَ اِلَّا کَآفَّۃً لِّلنَّاسِ بَشِیۡرًا وَّ نَذِیۡرًا (سبا:۲۸)
لَقَدۡ کَانَ لَکُمۡ فِیۡ رَسُوۡلِ اللّٰہِ اُسۡوَۃٌ حَسَنَۃٌ لِّمَنۡ کَانَ یَرۡجُوا اللّٰہَ وَ الۡیَوۡمَ الۡاٰخِرَ وَ ذَکَرَ اللّٰہَ کَثِیۡرًا ﴿ؕ۲۱﴾ (الاحزاب:۲۱) … صدق اللّٰہ العظیم
معزز حاضرین اور محترم خواتین‘ السلام علیکم ورحمۃ اللہ وبرکاتہ
میں اپنے موضوع پر براہِ راست گفتگو سے قبل آپ کے سامنے ایک سوال رکھ رہا ہوں کہ آج اُمتِ مسلمہ کی سب سے بڑی ضرورت کیا ہے؟ ہر شخص سوچے کہ کیا مال و دولت‘ حکومت‘ تعلیم‘ ٹیکنالوجی یا جمہوریت میں سے کوئی چیز ہماری سب سے بڑی ضرورت ہے؟ میرے تجزیئے کے مطابق آج اُمتِ مسلمہ کی سب سے بڑی ضرورت یہ ہے کہ وہ اسلامی انقلاب برپا کرنے کے اس طریقِ کار کو سمجھ لے جس طریقے پر محمد رسول اللہﷺ نے انقلاب برپا کیا. میری سوچ کے یہ پہلو تو آپ حضرات پر واضح ہوں گے کہ اس وقت عالمی پیمانے پر اُمتِ مسلمہ جس زبوں حالی کا شکار ہے یہ اصل میں عذابِ الٰہی ہے جس میں ہم مبتلا ہیں. اس کی وجہ یہ ہے کہ ہم زمین پر اللہ کے دین کے نمائندے بنائے گئے تھے‘ لیکن ہم آج پوری دنیا میں کوئی ایک ملک بھی بطور ماڈل ایسا نہیں دکھا سکتے جس کے بارے میں ہم یہ کہہ سکیں کہ لوگو آؤ‘ دیکھو‘ یہ ہے نظامِ مصطفیﷺ یہ ہیں اللہ کے دینِ حق کے قیام کی برکات!لہذا ہم اللہ کے عذاب کی گرفت میں ہیں.
یہ بات جان لیجئے کہ اللہ کے اِذن کے بغیربھارت اور امریکہ سمیت دنیا کی کوئی طاقت ہمارا کچھ نہیں بگاڑ سکتی. گویا اس وقت دنیا میں ہمارا جو حال ہو رہا ہے وہ اِذنِ ربّ ہی سے ہو رہا ہے. اور اس کا سبب یہ ہے کہ ہم اللہ کے دین کی صحیح نمائندگی نہیں کر رہے ‘ بلکہ اپنے عمل سے اسے misrepresent کر رہے ہیں. تو اس کا حل ایک ہی ہے کہ ہم کم از کم دنیا کے کسی ایک ملک میں صحیح صحیح اسلامی نظام قائم کر کے دکھا دیں. اور پھر دنیا کو دعوت دیں کہ آؤ ‘ دیکھو یہ ہے اسلام!
ملکی اور قومی سطح پر پاکستان کے بارے میں بھی میرا یہ موقف آپ کے علم میں ہے کہ پاکستان کے خاتمے کی الٹی گنتی شروع ہو چکی ہے. اس لیے کہ یہ اپنے قیام کی وجۂ جواز کھو بیٹھا ہے. البتہ ابھی اللہ کی طرف سے ایک مہلت باقی ہے اور اب اس کے بقاء و استحکام کی صرف ایک صورت ہے کہ یہاں پر اسلامی انقلاب برپاہو. یہ ملک اسی مقصد کے لیے قائم کیا گیا تھا. بانی و مؤسس پاکستان قائد اعظم نے کہا تھا کہ ہم پاکستان اس لیے چاہتے ہیں کہ اسلام کے اصولِ حریت و اخوت و مساوات کا ایک عملی نمونہ دنیا کے سامنے پیش کریں. یہی بات مفکر و مبشر و مصورِ پاکستان علامہ اقبال نے فرمائی تھی.
تیسری طرف یہ دیکھئے کہ عالمی سطح پر اس وقت دنیا کی سب سے بڑی قوت امریکہ اور اس کے حواری اس بات پر تُل گئے ہیں کہ دنیا میں کہیں پر اسلامی نظام کا ظہور نہ ہو . یہ وہی بات ہے جو علامہ اقبال نے ابلیس کی زبان سے کہلوائی تھی ؎
عصرِ حاضر کے تقاضاؤں سے ہے لیکن یہ خوف
ہو نہ جائے آشکارا شرعِ پیغمبرؐ کہیں!
ہو نہ جائے آشکارا شرعِ پیغمبرؐ کہیں!
ان تینوں زاویوں کے حوالے سے میری بات جس نقطے پر آ کر مرکوز ہوتی ہے وہ یہ ہے کہ اسلام کو نظامِ زندگی کے طور پر نافذ و غالب کرنے کے لیے صحیح لائحہ عمل واضح کیا جانا وقت کی سب سے بڑی ضرورت ہے. اور صحیح لائحہ عمل وہی ہو گاجو سیرت النبیؐ سے ماخوذ ہو. ہم نے وہ احادیث ایک جگہ جمع کر کے بہت عام کی ہیں جن سے یہ یقین پیدا ہوتا ہے کہ قیامت سے قبل پوری دنیا میں اسلام کا بول بالا ہو گا اور کفار کا ’’نیو ورلڈ آرڈر‘‘ نہیں‘ اسلام کا ’’ ـJust World Orderـ ‘‘ پوری دنیا پر غالب ہو کر رہے گا.یہ جس ’’نیو ورلڈ آرڈر‘‘ کو دنیا پر مسلط کرنا چاہتے ہیں وہ درحقیقت ’’جیو (یہودی) ورلڈآرڈر‘‘ ہے‘ جبکہ اسلامک ورلڈ آرڈر منصفانہ اور عادلانہ نظام ہے اور اس کے بارے میں محمد رسول اللہﷺ نے خوشخبری دی ہے کہ یہ قیامت سے قبل پوری دنیا پر غالب ہو گا.ظاہر بات ہے کہ اسلام کے عالمی غلبے کا آغاز اسی طور سے ہو گا کہ یہ نظام پہلے کسی ایک ملک میں قائم ہو گا‘ جیسے حضورﷺ کے دستِ مبارک سے ’’جَائَ الْحَقُّ وَزَھَقَ الْبَاطِلُ‘‘ کی کیفیت جزیرہ نمائے عرب میں پیدا ہوئی تھی. دنیا کے کسی ایک ملک میں بھی یہ نظام کیسے قائم ہو گا؟ ا س کے ضمن میں امامِ دار الھجرت امام مالکؒ ‘کا قول ہے : ’’لَا یَصْلُحُ آخِرُ ھٰذِہِ الْاُمَّۃِ اِلَّا بِمَا صَلَحَ بِہٖ اَوَّلُھَا‘‘ یعنی اس اُ مت کے آخری حصے کی اصلاح نہیں ہو سکے گی‘ مگر اسی طریقے پر جس پر کہ پہلے حصے کی اصلاح ہوئی تھی. چنانچہ آج اسلامی انقلاب برپا کرنے کے لیے ہمیں محمد رسول اللہﷺ کے انقلاب کا طریقِ کار اچھی طرح سمجھنا ہو گا اور پھر اسے apply کرنا ہو گا.
میں نے یہ چند باتیں بطور تمہید عرض کی ہیں تاکہ آج کی گفتگو کی اہمیت آپ پر واضح ہو جائے .آج غلبۂ اسلام کے لیے لوگوں کے جذبے میں کمی نہیں ہے‘ لیکن صحیح لائحہ عمل پیش نظر نہ ہونے کے باعث تحریکیں اِدھر اُدھر بھٹک رہی ہیں اور ان کا حال بالفعل یہ ہو گیا ہے کہ ؎
نشانِ راہ دکھاتے تھے جو ستاروں کو
ترس گئے ہیں کسی مردِ راہ داں کے لئے!
ترس گئے ہیں کسی مردِ راہ داں کے لئے!