(۱) پہلی منزل کے تین جہاد

’’ایماں مجھے روکے ہے تو کھینچے ہے مجھے کفر
کعبہ مرے پیچھے ہے کلیسا مرے آگے!‘‘

نفسِ ما ہم کم تر از فرعون نیست
لیکن او را عون ایں را عون نیست!

۲ . شیطانِ لعین اور اس کے غیر مرئی لشکر کے خلاف جہاد :

شیطان ہمارے نفسانی تقاضوں میں پھونکیں مارتا اور انہیں مشتعل کرتا ہے. شیطان ہمیں ورغلاتا ہے‘برے راستے کو مزین کر کے دکھاتا ہے ‘ اس لیے کہ شیطان ہمارا دشمن ہے. قرآن حکیم میں ارشاد ہوا: اِنَّ الشَّیْطٰنَ لَــکُمْ عَدُوٌّ فَاتَّخِذُوْہُ عَدُوًّا (فاطر:۶) ’’درحقیقت شیطان ہمارا دشمن ہے‘ لہذا تم بھی اسے دشمن ہی سمجھو.‘‘ سورۃ کہف میں شکوے کے انداز میں فرمایا: اَفَتَتَّخِذُوۡنَہٗ وَ ذُرِّیَّتَہٗۤ اَوۡلِیَآءَ مِنۡ دُوۡنِیۡ وَ ہُمۡ لَکُمۡ عَدُوٌّ ؕ بِئۡسَ لِلظّٰلِمِیۡنَ بَدَلًا ﴿۵۰﴾ ’’کیا تم مجھے چھوڑ کر ابلیس اور اس کی ذریت (اس کے ایجنٹ اور چیلے چانٹوں) کو اپنا دوست (اور سرپرست) بناتے ہو‘ حالانکہ وہ تمہارے دشمن ہیں؟ بہت ہی برا بدل ہے جسے ظالم لوگ اختیار کر رہے ہیں.‘‘ میری دوستی اور میری ولایت کو چھوڑ کر انہوں نے شیطانِ لعین کے ساتھ دوستی گانٹھ لی ہے؟ شیطان کے بارے میں قرآن مجید کہتا ہے : اِنَّہٗ یَرٰىکُمۡ ہُوَ وَ قَبِیۡلُہٗ مِنۡ حَیۡثُ لَا تَرَوۡنَہُمۡ ؕ (الاعراف:۲۷) ’’شیطان اور اس کے ساتھی تمہیں ایسی جگہ سے تاکتے ہیں (اور وہاں سے حملہ آور ہوتے ہیں) جہاں سے تم انہیں نہیں دیکھ سکتے.‘‘ایک غیر مرئی شیطان (جن) تو ہر انسان کے ساتھ لگا دیا گیا ہے جو اسے برائی پر اکساتا رہتا ہے.
ایک حدیث میں الفاظ آئے ہیں : اِنَّ الشَّیْطَانَ یَجْرِیْ مِنَ الْاِنْسَانِ مَجْرَی الدَّمِ (۹) (متفق علیہ) یعنی ’’شیطان تو انسان کے وجود میں اس طرح سرایت کر جاتا ہے جیسے کہ خون گردش کرتا ہے.‘‘ اب اس کی دو توجیہات ممکن ہیں. ایک تو یہ کہ یہ شیاطین چونکہ جِنّات ہیں اور ان کا مادہ تخلیق نار ہے اور نار ایک لطیف شے ہے‘ لہذا اس کی لطافت کی وجہ سے وہ واقعتا انسان میں سرایت ہی کر جاتے ہوں. دوسرے یہ کہ ایسا بھی ہو سکتا ہے کہ وہ ہمارے نفس کو مشتعل کر دیتے ہوں‘اور چونکہ نفس ہمارے پورے انسانی وجود کو کنٹرول کر رہا ہے‘ تو اس طرح گویا وہ بالواسطہ ہمارے پورے وجود میں سرایت کر جاتے ہوں. واللہ اعلم.

۳ . بگڑے ہوئے معاشرے کے خلاف جہاد:

اگر کوئی معاشرہ بگڑ گیا ہے اور اس کے رجحانات غلط ہو گئے ہیں تو اس کا ایک دباؤ ہوتا ہے جو انسان کو غلط رُخ کی طرف لے جانا چاہتا ہے. ہر شخص کو ذاتی طور پر اس کا تجربہ ہو گا کہ کوئی ہجوم ایک رُخ پر جا رہاہو تو اُس رُخ پر چلنا بہت آسان ہو جاتا ہے‘ لیکن اس کے خلاف چلنے کے لیے بڑی مشقت و محنت کی ضرورت ہوتی ہے. یہ بھی ہو سکتا ہے کہ بڑا زور لگا کر آپ دوچار قدم آگے بڑھائیں لیکن اس ہجوم کا ایک ریلا آئے اور وہ آپ کو دھکیل کر پھر دس قدم پیچھے لے جائے.لہذا اگر معاشرے کا رُخ بے حیائی کی طرف ہے‘ معاشرہ اللہ کی بغاوت کی طرف چل رہا ہے اور سب لوگ اس حال میں خوش و خرم‘ مسرور اور مگن ہیں اور وہ اس رخ پر بڑھتے چلے جا رہے ہیں‘ تو ان میں سے کسی ایک شخص کا اللہ کی طرف رخ کرکے بڑھنا اور ’’اِنِّیْ وَجَّھْتُ وَجْھِیَ لِلَّذِیْ فَطَرَ السَّمٰوٰتِ وَالْاَرْضَ حَنِیْفًا‘‘ کا اعلان کرنا آسان کام نہیں ہے.
ایسے شخص کو اس معاشرے کے خلاف شدید جدوجہد کرنی پڑے گی‘ اور ہو سکتا ہے کہ اسے سب سے پہلے اپنے گھر والوں کے خلاف ہی جہاد کرنا پڑے. سورۃ التغابن میں فرمایا:

یٰٓــاَیـُّھَا الَّذِیْنَ اٰمَنُوْا اِنَّ مِنْ اَزْوَاجِکُمْ وَاَوْلَادِکُمْ عَدُوًّا لَّــکُمْ فَاحْذَرُوْھُمْ
’’ اے اہل ایمان! تمہاری اپنی بیویوں اور تمہاری اولاد میں تمہارے دشمن موجود ہیں‘ لہٰذا ان سے بچ کر رہو.‘‘

اور پھر یہ کہ مال اور اولاد کو فتنہ قرار دیا گیا ہے. چنانچہ یہ سارا معاملہ گھر سے شروع ہو جائے گا. پھر رشتہ داری اور برادری کا معاملہ ہے. آپ نے اس معاشرے میں رہنا ہے اور اس کے اپنے غیر اسلامی رسوم و رواج ہیں. تو اب برادری اور قبیلے سے کیسے کٹ جائیں؟ اس کا دباؤ ہے. اب آپ کے سامنے دو ہی راستے ہیں. آسان راستہ تو یہ ہے کہ ع ’’زمانہ باتو نہ سازد توبازمانہ بساز!‘‘یعنی اگر زمانہ تمہارے ساتھ موافقت نہیں کر رہا ہے تو تم زمانے کے ساتھ موافق ہو جاؤ اور اسی رنگ میں ڈھل جاؤ. اس طرح کھینچا تانی (friction) ختم ہو جائے گی. اختلاف اور مزاحمت تو اسی وقت ہوتی ہے کہ لوگ اُدھر جا رہے ہوں اور تم اِدھر آ رہے ہو‘ لیکن اگر تم نے بھی وہی رخ اختیار کر لیا تو سیدھا اور آسان راستہ ہے. لیکن جس چیز کو جہاد کہا جائے گا وہ یہ ہے کہ ع ’’زمانہ باتونہ سازد تُو بازمانہ ستیز!‘‘ یعنی اگر زمانہ تمہارے ساتھ موافقت نہیں کر رہا ہے تو تم زمانے سے جنگ کرو‘ اس کے خلاف لڑو‘ جہاد کرو.

یہ تھی جہاد فی سبیل اللہ کی پہلی منزل‘ جس کے تین مراتب یا مدارج (sub stages) میں نے آپ کو بتائے ہیں.