اللہ کے بندو‘باہم بھائی بھائی بن کے رہو!

زیر مطالعہ حدیث میں چار منفی باتوں کو بیان کرنے کے بعد رسول اللہﷺ نے پانچویں بات یہ فرمائی: وَکُوْنُوْا عِبَادَ اللّٰہِ اِخْوَانًا ’’اور اللہ کے بندو ‘آپس میں بھائی بھائی بن جاؤ‘‘ اللہ کے بندے بن کر سب برابرہو گئے تو اب کوئی حاکم نہیں رہا‘ کوئی محکوم نہیں رہا. جب ایران کا سفیر مدینہ منورہ آیا تو اِدھر اُدھر پھرااور اسے کہیں کوئی محل نظر نہیں آیا تواس نے پوچھا کہ تمہارا بادشاہ کہاں ہے؟اسے جواب ملا کہ ہمارے ہاں بادشاہ نہیں ہوتا‘بلکہ ہمارا ایک امیر ہوتاہے . اس نے پوچھا تو وہ امیر کہاں ہے‘مجھے تو یہاں ان کا کوئی محل نظر نہیں آیا.اسے بتایاگیا کہ ہمارے بیت المال کے کچھ اونٹ گم ہو گئے تھے‘ لوگوں نے بہت تلاش کیے‘ لیکن وہ نہیں ملے تو ہمارے امیر ان اونٹوں کی تلاش میں صحرا کی طرف گئے ہیں. اب ظاہر بات ہے کہ اُس نے کسی شخص کو ساتھ لیاہوگا تاکہ وہ امیر کو پہچان تو سکے اور صحرا کی طرف آپؓ کو ڈھونڈنے نکلا. حضرت عمرفاروق رضی اللہ عنہاونٹ تلاش کرکے تھک گئے تھے اور اونٹ کہیں نہیں ملے تھے.