خدا فراموشی اور ہدایت ربانی سے محرومی کے باعث مغربی تہذیب جس کرب اور المیہ سے دوچار ہے‘ ہماری عظیم اکثریت کو اس کا پتا ہی نہیں. ہم ان ممالک کی ظاہری شان و شوکت اور جاہ و حشمت دیکھ کر یہ سمجھ لیتے ہیں کہ دنیا میں ان سے زیادہ خوش نصیب کوئی نہیں. ’’دُور کے ڈھول سہانے ہوتے ہیں‘‘ کے مصداق ان کے ٹھاٹھ باٹھ اور تمدنی ترقی سے ہم اتنے مرعوب ہیں کہ ہمیں ان کے آلام و مصائب کا اندازہ ہی نہیں ہوتا اور ہم اس مغالطے میں مبتلا ہوتے ہیں کہ وہاں ہر طرح سکھ‘ چین اور سکون و اطمینان ہے. حالانکہ اس خداناآشنا تہذیب کا قریبی مشاہدہ کرنے والے جانتے ہیں کہ ان خدافراموش ممالک میں خاندانی نظام درہم برہم ہو چکا ہے‘ جس کی وجہ سے پورا معاشرہ انتہائی کرب اور دکھ میں مبتلا ہے. وہاں آزادانہ شہوت رانی کا دور دورہ ہے ‘لہذا شادی بیاہ کا بکھیڑا کون مول لے.
جن لوگوں میں سابقہ روایات کا کچھ پاس ہے‘ وہ شادی کا بندھن اختیار کرتے ہیں ‘تو اُن میں سے اکثر کا حال یہ ہے کہ شوہر بیوی سے نالاں اور اس کی عصمت و عفت کے بارے میں شک و شبہ میں مبتلاہے تو بیوی شوہر سے بیزار اور اس کے باوفا ہونے کے بارے میں شکوک میں مبتلا. مزید برآں اوّل تو مانع حمل تدابیر سے اولاد کے جھمیلے سے بچاؤ ہوتا ہے‘ لیکن کسی کو اگر اولاد کی چاہت ہوئی بھی تو اکثریت کے بچے نرسریوں (Nurseries) میں پرورش پاتے ہیں. لہذا محبت مادری اور شفقت پدری سے یکسر محروم اس اولاد کے دل والدین کی محبت اور احترام سے بالکل خالی ہوتے ہیں. والدین جب بوڑھے ہو جاتے ہیں تو ان کے دلوں میں اولاد کی محبت کا خوابیدہ جذبہ بیدار ہوتا ہے ‘لیکن اولاد کا حال یہ ہوتا ہے کہ ماں باپ کی خدمت تو کجا‘ ان سے ملنے اور ان کے ساتھ کچھ لمحات گزارنے کے لیے بھی ان کے پاس فرصت اور وقت ہی نہیں. بوڑھے ماں باپ اولاد کی شکل دیکھنے کے لیے سالوں ترستے رہتے ہیں. وہاں ایسے بوڑھے مردوں اور عورتوں کے لیے جن کی بیویاں یا شوہر وفات پا چکے ہوں اور جو تنہا رہ گئے ہوں‘ ہاسٹل قائم ہیں تاکہ وہ دوسرے بوڑھوں اور بوڑھیوں کی معیت میں تنہائی کے احساس کو مٹا سکیں. یہ ہے خاندانی نظام کے برہم ہونے کی نقد سزا جو مغربی معاشرہ بھگت رہا ہے.