’’دعوتِ رجوع الی القرآن‘‘

’’حضرت شیخ الہند رحمہ اللہ علیہ کی جماعت‘‘ او ر ’’مسئلہ امامت و امارت‘‘ مولانا اخلاق حسین قاسمی مدظلہ‘ کے فرمودات پر چند گزارشات

میرے خیال میں ڈاکٹر صاحب کو سھو ہوا‘ موصوف جس احتیاط کے ساتھ کام کر رہے ہیں وہ احتیاط اس تقریر میں قائم نہ رہ سکی!‘‘ 

’’ڈاکٹر صاحب موصوف نے میثاق نومبر (مراد ہے دسمبر) کے پرچے میں اس غلط فہمی کو دُور کرتے ہوئے جو کچھ لکھا ہے وہ علماء حق کومطمئن کرنے کے لیے کافی ہے اس کا تقاضا ہے کہ ڈاکٹر صاحب کے فقہی موقف کی حوصلہ افزائی کی جائے!‘‘ 

’’البتہ اس بحث کے ساتھ ساتھ ڈاکٹر صاحب نے ایک دوسرے بڑے جھگڑے کو چھیڑ دیا ہے اور امامت و امارت کا مسئلہ کھڑا کر دیا ہے. اور ساتھ ہی اس کا جوڑ مولانا ابوالکلام آزادؒ کی امارت کے بارے میں حضرت شیخ الہندؒ کی تجویز سے لگا دیا ہے. گویا ڈاکٹر صاحب نے بِھڑوں کے چھتے کو چھیڑ دیا ہے!‘‘ اور اختتام ان الفاظ پر فرمایا: 

وہ دن اور آج کا دن! راقم کی پختہ رائے ہے کہ چودہویں صدی ہجری کے مجدد حضرت شیخ الہندؒ تھے! اس لیے کہ ان کی سی ’’جامعیت کبریٰ‘‘ کی حامل کوئی دوسری شخصیت اس پوری صدی میں کم از کم مجھے نظر نہیں آتی. 

اگر ’’حضرت شیخ الہندؒ کی جماعت‘‘ کسی حقیقت واقعہ کا نام ہے تو ۱۹۲۰ء میں اُس کا عظیم ترین مظہر مولانا کلام آزاد کی ذات تھی! (۱) 

اور اگر یہ صحیح ہے کہ یہ۱۹۱۲ء تا۱۹۲۰ء والے مولانا ابوالکلام آزاد ہی کی شخصیت کا معنوی تسلسل تھا جو ۳۲.۱۹۳۳ء میں مولانا ابوالاعلیٰ مودودی کی صورت میں سامنے آیا اور یہ ’’الہلال‘‘ اور ’’البلاغ‘‘ ہی کے پیغام کی صدائے بازگشت تھی جو ماہنامہ ’’ترجمان القرآن‘‘ کے ذریعے دوبارہ لوگوں کے کانوں تک پہنچی اور یہ ’’حزب اللہ‘‘ ہی کی بدلی ہوئی صورت تھی جو ۱۹۴۱ء میں جماعت اسلامی کی شکل میں سامنے آئی تو کیا یہ نتیجہ نکالنا غلط ہو گا کہ: 
مولانا سید ابو الاعلیٰ مودودی مرحوم بھی حضرت شیخ الہندؒ ہی کی جماعت کے ایک فرد تھے اور ان کا ترتیب دیا ہوا قافلۂ غلبہ و اقامتِ دین بھی ’’جماعت شیخ الہندؒ ‘‘ ہی کی ایک شاخ تھا! 

اور چونکہ راقم الحروف کو حق الیقین کے درجہ میں وثوق حاصل ہے کہ ابو الکلام آزاد مرحوم اور ابوالاعلیٰ مرحوم کی دعوت‘ اور ’’حزب اللّٰہ‘‘ اور ’’جماعت اسلامی‘‘ کی تنظیمی ہئیتیں ایک ہی سلسلہ کی کڑیاں ہیں‘ لہٰذا راقم کو نہایت پسند بھی آئے اور حد درجہ معنی خیز بھی نظر آئے مولانا اخلاق حسین قاسمی مدظلہٗ کے مولانا مودودی کے بارے میں ’’علماء دیوبند کے فیض یافتہ عالم‘‘ کے الفاظ !

جہاں تک مولانا آزاد مرحوم کی حیاتِ دنیوی کے ۱۹۲۰ء تا ۱۹۵۸ء کے دَور کا تعلق ہے مجھے اصلاً اُس سے نہ دلچسپی ہے نہ بحث. اور اپنی بیس سالہ پبلک لائف کے دوران میں نے اس کے بارے میں نفیاً یا اثباتاً بہت ہی کم کہا یا لکھا ہے. تاہم ریکارڈ درست رکھنے کے لیے عرض ہے کہ میرے نزدیک اس مسئلے کے تین گوشے ہیں: ایک ذاتی سیرت و کردار اور اس کا بھی ایک گوشہ ہے بنیادی انسانی کیریکٹر کا اور دوسرا گوشہ ہے تقویٰ و تدین کا! دوسرے نظریات و خیالات اور تیسرے سیاسی حکمت عملی. 

البتہ ان کے تقویٰ و تدین اور بعض نظریات و خیالات کے بارے میں متضاد آراء موجود ہیں. تاہم راقم کے نزدیک ان کی ذات کی حد تک تو کف ِلسان اور ’’اُذْکُرُوْا مَوْتَاکُمْ بِالْخَیْرِ‘‘ پر عمل اولیٰ و انسب ہے ہی‘ ان کے خیالات کے بارے میں بھی خود یہ رائے رکھنے کے باوجود کہ کچھ اپنی فلسفیانہ افتادِ طبع اور کچھ گاندھی جی کے قرب کے باعث وہ ان کے مرشد راجہ رام موہن رائے کے ایجاد کردہ ’’نظریہ ٔوحدت ادیان‘‘ سے کسی قدر متاثر ہو گئے تھے‘ راقم کا طرز عمل یہی ہے کہ کبھی اس کا ذکر ہوتا بھی ہے تو نہایت اجمال و اختصار سے‘ اور 
راقم کے نزدیک اصل اہمیت اسلام کی اس اصولی و انقلابی دعوت کی ہے جس کے برصغیر پاک و ہند میں اس صدی کے داعیٔ اول کی حیثیت عطا فرمائی اللّٰہ تعالیٰ نے مولانا ابو الکلام آزاد مرحوم کو. 

راقم کے نزدیک اصل اہمیت اس اصولی دعوت و تحریک کی ہے جس کے وہ ۱۹۳۹ء تا ۱۹۴۷ء داعی و قائد رہے اور جو اصلاً تسلسل ہے مولانا ابو الکلام آزاد مرحوم ہی کی ۱۹۱۲ء تا ۱۹۲۰ء کی دعوت و تحریک کا. اور جس کی امانت کا بارِ گراں اب راقم الحروف اپنے ضعیف و ناتواں شانوں پر محسوس کرتا ہے. اور اس اصولی دعوت و تحریک کی حد تک چونکہ مولانا آزاد کو سند حاصل تھی حضرت شیخ الہندؒ کی‘ لہٰذا راقم اپنے آپ کو ان دو ’’واسطوں‘‘ سے اصلاً منسلک سمجھتا ہے شیخ الہندؒ حضرت مولانا محمود حسن رحمۃ اللّٰہ علیہ کے ساتھ! 

جہاں تک مولانا حسین احمد مدنی ؒ کی زیر قیادت جمعیت علماء ہند اور کانگریس میں شمولیت کی بنا پر مولانا آزاد مرحوم کی سیاسی حکمت عملی کا تعلق ہے‘ مجھے اس میں ہرگز کوئی اشتباہ نہیں ہے کہ وہ اصلاً حضرت شیخ الہندؒ ہی کی اختیار کردہ تھی. اور مجھے مولانا قاسمی مدظلہٗ کے ان الفاظ سے ہرگز کوئی اختلاف نہیں کہ ’’مشترکہ جدوجہد کا منصوبہ شیخ الہندؒ اسارتِ مالٹا سے اپنے ساتھ لائے تھے‘‘ بلکہ مولانا کی تحریر سے میرے علم میں یہ اضافہ ہوا ہے کہ ’’ترکی قائدین نے شیخ کو یہ مشورہ دیا تھا کہ ہندوستانی مسلمان تنہا جدوجہد کر کے انگریزوں کو ہندوستان سے نہیں نکال سکتے. جیسا کہ وہ اب تک ناکام رہے ہیں‘‘ (۱) بلکہ اس ضمن میں مَیں مولانا مدنی ؒ کے اس موقف کو صد فی صد درست سمجھتا ہوں جو انہوں نے اپنی خود نوشت سوانح ’’نقش حیات‘‘ میں پیش فرمایا ہے کہ (۱) ان ہی دنوں ’’بیس بڑے مسلمان‘‘ نامی کتاب کی ورق گردانی کرتے ہوئے یہ بات بھی نظر سے گزری‘ اور مجھے اعتراف ہے کہ یہ بھی میرے علم میں اضافہ کا موجب بنی ہے کہ امیر حبیب اللہ خان والی ٔافغانستان نے بھی بعینہٖ یہی مشورہ مولانا عبید اللہ سندھی مرحوم کو دیا تھا. انگریز کی غلامی سے گلو خلاصی کے لیے ہندوؤں اور مسلمانوں کی مشترکہ جدوجہد کا راستہ تیرہویں صدی کے مجدد‘مجاہد کبیر حضرت سید احمد بریلویؒ کا اختیار کردہ تھا (۱) اور اس مسئلے میں جو شدید اورجارحانہ تنقیدیں مولانا مودودی مرحوم نے جمعیت علماء ہند اور عرفِ عام کے مطابق ’’نیشنلسٹ علماء‘‘ پر کیں انہیں مَیں انتہا پسندی کا مظہر سمجھتا ہوں اور میرے نزدیک ایک دفاعی حربے کے طور پر ’’متحدہ قومیت‘‘ کے تصور کو عارضی طور پر اختیار کر لینا ہرگز نہ کفر تھا نہ شرک‘ جیسا کہ مولانا مودودی نے اپنی انتہا پسندی کی بنیاد پر اور اپنی انشاء پردازانہ مہارت کے ذریعے اُسے بنا دیا تھا!

اس لیے کہ واقعہ یہ ہے کہ جب بھی ہندوستان سے مسلمانوں کے کسی تازہ قتل عام کی خبر آتی ہے دوسرے لاکھوں اور کروڑوں حساس مسلمانوں کی طرح راقم الحروف کے دل پر بھی چھریاں چل جاتی ہیں. اور نہ صرف یہ کہ یہاں کا سکھ چین کاٹ کھانے کو دوڑنے لگتا ہے‘ بلکہ سیدنا مسیحؑ کی تمثیل کے عین مطابق ہر کھانا ہندوستان کے مظلوم مسلمانوں کا گوشت اور ہر مشروب ان کا خون نظر آنے لگتا ہے. 

بہرحال راقم الحروف کا تو حضرت شیخ الہندؒ کی شخصیت سے ابتدائی تعارف ہی تفسیری فوائد کی وساطت سے علامہ عثمانی ؒ ہی کے ذریعے سے ہوا تھا اور راقم اپنی گردن پر ایک احسان عظیم سمجھتا ہے شیخ الہندؒ مولانا محمود حسن دیوبندی اور شیخ الاسلام مولانا شبیر احمد عثمانی ؒ کا کہ علامہ اقبال مرحوم کے اشعار سے ایک مبہم سے جذبہ ملّی اور ’’میلان الی القرآن‘‘ کے حصول ‘ اور ابتداء ً مولانا سید ابو الاعلیٰ مودودی مرحوم اور مولانا امین احسن اصلاحی کی تصانیف اور بعد ازاں مولانا مودودی کی ’’تفہیم القرآن‘‘ اور مولانا اصلاحی کی ’’تدبر قرآن‘‘ کے ذریعے معانی قرآن کے ساتھ ابتدائی تعارف کے بعد جب راقم نے بھی آزادانہ طور پر علم و حکمت قرآن کے بحر ذخار میں غوطہ زنی شروع کی تو اس پورے عرصے میں میرا ’’عروۃ وثقٰی‘‘ ترجمہ شیخ الہندؒ اور حواشی شیخ الاسلام ہی رہے ہیں. جنہوں نے مجھے بفضلہ تعالیٰ نئی نکتہ طرازیوں اور دور دراز کی تاویلوں سے حفاظت میں رکھا ہے. 
اور اس اعتبار سے بھی میں اپنے آپ کو بواسطہ شیخ الاسلام مولانا شبیر احمد عثمانی ؒ منسلک اور متوسل سمجھتا ہوں شیخ الہندؒ حضرت مولانا محمود حسن دیوبندیؒ سے! 

اس موضوع پر اس قدر طولِ کلام سے راقم الحروف نے اس لیے کام لیا ہے کہ جیسا کہ مولانا اخلاق حسین قاسمی مدظلہٗ نے بھی فرمایا‘ اور راقم بھی عرض کر چکا ہے‘راقم کو یقین ہے کہ چودہویں صدی ہجری کے مجدد تھے حضرت شیخ الہندؒ ! اور ان کی جامعیت کبریٰ کے مظہر اتم ہی ں ان کے تلامذہ بحیثیت مجموعی! اور اگرچہ ان میں سے کوئی بھی ان کی سی جامعیت کا مظہر تو نہ تھا تاہم ان میں سے ہر ایک نے برصغیر پاک و ہند کی ماضی قریب کی تاریخ پر نہایت گہرا اثر ڈالا ہے. اور پاکستان اور ہندوستان کے موجودہ مسلمان معاشرے میں مختلف عنوانات کے ذیل میں اور مختلف تحریکوں اور تنظیموں میں منقسم صورت میں جو بظاہر ایک دوسرے سے بہت مختلف بلکہ متضاد نظر آتی ہیں درحقیقت اثرات پھیلے ہوئے ہیں حضرت شیخ الہندؒ ہی کی عظیم ذاتِ جامع الصفات کے‘ بالکل اُس شان سے جو علامہ اقبال کے ان اشعار میں سامنے آتی ہے کہ: ؎
اور اب اصل ضرورت اس امر کی ہے کہ اس ظاہری افتراق و انتشار میں تالیف و اجتماع کی صورت پیدا کی جائے اور ان بکھرے ہوئے اثرات کو از سر نو سمیٹ کر تعمیر نو کی سعی کی جائے !! اس شان کے ساتھ کہ ؎
اور اسی کے لیے کمر ہمت کَسی ہے حضرت شیخ الہندؒ کے اس ادنیٰ عقیدت مند‘ اور ان کے علم و فضل اور جذبہ و جوش عمل کے اس ادنیٰ خوشہ چیں نے‘ بفحوائے ؎
چنانچہ راقم اللہ کو گواہ بنا کر عرض کرتا ہے کہ راقم کے دل میں بلا تکلف و تصنع از خود محبت و عقیدت پیدا ہو جاتی ہے ہر اُس شخص سے جس کا ادنیٰ سے ادنیٰ تعلق رہا ہو حضرت شیخ الہندؒ سے. یا جسے ادنیٰ سے ادنیٰ نسبت حاصل ہو اُن کی ذات گرامی سے! اور راقم ہاتھ باندھ کر عرض کرتا ہے جملہ متوسلان حضرت شیخ الہندؒ کی خدمت میں کہ خدارا! وقت کی پکار کو کھلے اور متوجہ کانوں اور کشادہ و ’’حاضر‘‘ دلوں سے سنیں‘ بفحوائے الفاظِ قرآنی: 
اِنَّ فِیْ ذٰلِکَ لَذِکرٰی لِمَنْ کَانَ لَہٗ قَلْبٌ اَوْ اَلْقَی السَّمْعَ وَ ھُوَ شَھِیْدٌ 

رہا مولانا اخلاق حسین قاسمی مدظلہٗ کی تحریر کے آخری حصے میں وارد شدہ پند و نصائح کا معاملہ تو ان کے ضمن میں گزارش ہے کہ راقم نے جب مولانا اللہ بخش ایاز ملکانوی صاحب کے نام خط میں یہ لکھا:

تو اس سے مقصود نہ کسی کی دلآزاری تھی‘ نہ توہین و تنقیص اور نہ طنز و تعریض‘ بلکہ صرف اور صرف صورتِ واقعہ کا ’’کما ھِیَ‘‘ بیان و اظہار تھا‘ تاکہ سینوں میں درد اور دلوں میں سوز و گداز پیدا ہو. ورنہ واقعہ یہ ہے کہ راقم کے قلب کی گہرائیوں میں حد درجہ قدر و وقعت اور کمال محبت و عقیدت موجود ہے ان علماء کرام کے لیے بھی جو شب و روز قال اللہ تعالیٰ اور قال الرسول ﷺ میں مصروف و مشغول رہتے ہیں یا جمعہ و جماعت اور وعظ و خطابت کے فرائض سر انجام دیتے ہیں اور ان مربی اور مزکی حضرات کے لیے بھی جو لوگوںکے نفوس کے تزکیے‘قلوب کی تنویر اور روح کے تجلئے میں منہمک رہتے ہیں. رہی جماعت تبلیغی‘ تو یہ تو راقم عرض کر ہی چکا ہے کہ اُسے بھی راقم حضرت شیخ الہندؒ کی جماعت کی ایک شاخ سمجھتا ہے‘مزید برآں راقم کے قلب و ذہن میں اس کے نقل و حرکت کی وسعت اور اس کے اصحابِ عزم و ہمت کے خلوص و اخلاص کے احساس و شعور کی کوئی کمی نہیں. اور آخری بات یہ کہ راقم اللہ کے فضل و کرم کے پورے احساس و ادراک اور اس پر اُس (تعالیٰ) کی حمد و شکر کے ساتھ اپنا یہ ’’مشاہدہ‘‘ عرض کر رہا ہے کہ متعدد گوشوں اور مختلف واسطوں سے یہ اطلاعات مل رہی ہیں کہ اب اس حلقے میں بھی جہاد و قتال کی باتیں ہو رہی ہیں اور آخری منزل مقصود کے طور پر غلبہ و اقامت دین ہی کا ذکر ہو رہا ہے. راقم کے لیے یہ اطلاعات حد درجہ حوصلہ افزا اور اُمید بخش ہیں اور ان سے راقم کی اس توقع کو بہت تقویت حاصل ہوئی ہے کہ ان شاء اللہ خدمت دین کے یہ قافلے جلد ایک دوسرے سے متحد اور ایک ہی عظیم تر تنظیم و تشکیل میں ضم و مدغم ہو جائیں گے اور پھر اللہ نے چاہا تو وہ دن دُور نہیں رہے گا جب:
یعنی: وَیَکُوْنَ الدِّیْنُ کُلُّہٗ لِلّٰہِ وَمَا ذٰلِکَ عَلَی اللّٰہِ بِعَزِیْزٍ